غم داشیم- ای غمگساریم هارداسان!!
غم گوزومده توی توتوب طوفان ائدیر
کئفله نیب سرمست اولوب هزیان ائدیر
"های-هارای" سالمیش منی قوربان ائدیر
غم داشیم- ای غمگساریم هارداسان!!
گل اوزون مین دردیمه بیرچاره سن
ظولمه تی محکوم ائله چک داره سن
"هیجرانا" کوینک گئییندیر قاره سن
یورغونام ، ای داغ ویقاریم هارداسان!!
قونجه یم، گوللنمه رم سن گئلمه سن
بولبولم ، دیللنمه رم سن گئلمه سن
ایتمیشم ، بیللنمه رم سن گئلمه سن
گولشه نیم - ای نوباهاریم هارداسان!!
دیرناغیملا یوللارین دردیم داشین
اولماسین توز سپمیشم من گوز یاشین
گل یئتیش قوی پایلاییم نذرین آشین
طالعئیم - ای بختیاریم هارداسان!!
کیم دئییب وارلیق بوتون افسانه دی
تاج و تخت و مولک ری ویرانه دی
دانمیرام اونلار سنه بیگانه دی
وارلیغیم - دار و نداریم هارداسان!!
حسرتینده ن های - هارایلی آغلارام
سینه سی داشلی اوره کلر داغلارام
یاره مه گوز یاشی مرهم باغلارام
گوزیاشیم - ای اینتیظاریم هارداسان!!
